Турција станува кредитор на ММФ?

Добивај вести на Viber

Последната рата во вторник ја отплатува Турција од кредитот на Меѓународниот монетарен фонд, со што после 52 години од заемопримател станува давател на меѓународна помош, пишува новинската агенција Анатолиа. Турското министерство за финансии денеска треба да отплати 422,1 милиони долари на ММФ со што во целост ќе го врати заемот од оваа финансиска институција, кој вкупно изнесуваше 23,5 милијарди долари. Турција прв пат доби заем од ММФ во 1961 година, а последен пат по средства  до финансиската институција посегна во 2008 година. -На Турција повеќе не и треба финансиска поддршка од ММФ благодарение на својата политичка и економска стабилност и далекусежните реформи кои ги спроведе владеачката Партија на правдата и развојот од кога дојде на власт во 2012 година, изјави турскиот министер за економија Зафер Чаглајан. Од 2002 година државниот долг е намален од 78 отсто од БДП на околу 40 отсто, што доведе до намалување на трошоците на задолжување на Турција под цената, што ја плаќаат Русија, Индија и Чиле, држави со повисок кредитен рејтинг. -Во последните четири години имаше многу загуби во светската и европската економија. Европската економија паѓаше, додека турската го зголемуваше извозот ширум светот. Турција ќе ја отплати својата последна рата од кредитот на ММФ и повеќе на таа институција нема да и должи ништо. Ќе ја претвориме нашата држава во земја која ќе му даде свој придонес на ММФ од пет млрд. долари. Се работи за историски пресврт“, рече Чаглајан.