Турски бизнисмени во Македонија, бараат пазар за инвестиции

Добивај вести на Viber

Турски бизнисмени дојдоа во Македонија за да видат какви можности за инвестиции се нудат во земјава. Претставниците на 23 турски компании кои дојдеоа од Бергама, развиен индустриски и земјоделски регион во Турција, се сретнаа со македонските колеги за да видат што може да се направи во секторите како градежништво, фармација, живинарство, угостителство, трговија. „Македонските можности за инвестирање за странските инвеститори се многу привлечни. Не станува збор само за инвестирање, туку потребен е и соодветен пазар за инвестицијата што ќе се направи. Ако бизнисмените увидат дека нема никаков проблем со пазарот, тогаш нема никаква причина да не се инвестира тука“, изјави Фикрет Урер, претседател на Стопанската комора на Бергама. Според него има подобрување во бизнис климата во земјава последната деценија, а поради добрите врски верува дека полесно им е да соработуваат со Македонија отколку со други држави, Македонските претставници пак посочија дека има потенцијали за соработка во повеќе области и е неопходно да се работи на намалување на трговскиот дефицит на македонска страна. „Трговската размена меѓу Македонија и Турција изнесува околу 400 милиони долари, при што македонскиот извоз на турскиот пазар изнесува 80 милиони долари, а увозот на турски производи 320 милиони долари. Сојузот на стопански комори смета дека тоа мора да го промениме и затоа инсистираме на средби со турски бизнисмени, како денешната со Стопанската комора на Бергама, развиен индустриски и земјоделски регион, со кој сметаме дека може да се остварат конкретни директни соработки не само за македонските компании, туку и за турските“, изјави Митко Алексов, извршен директор на ССК.