Турци ќе го градат Сончев Град?!

Добивај вести на Viber

На само еден ден до јавното наддавање, во општината Сопиште пристигната е само една понуда за изградба на луксузниот грандиозен проект на јужните падини на Водно. Фактор неофицијално дознава дека понудата е од турска компанија која веќе има големи инвестиции во земјава. Соња Јованова Наумовска Само една странска компанија е заинтересирана да ја гради елитната населба на јужните падини на Водно. За Сончев град пристигната е една понуда, иако градоначалникот на Сопиште се надева дека во меѓувреме по пошта може да пристигне уште некоја понуда, бидејќи јавното наддавање ќе се одржи утре. Неофицијално, фирмата која доставила понуда е турска компанија веќе присутна во Македонија и актуелна во изградба на големи проекти. На домашниот пазар од неодамна влезени се турските инвеститори Џеваир Холдинг која ги гради висококатниците во скопската општина Аеродром и Лимак Холдинг која го гради Јужниот булевар. Интерес за градење на грандиозниот проект досега покажале многу странски инвеститори од Катар, Индија, Турција, Египет и Америка, кои биле и во посета на општината, интересирајќи се за деталите околу проектот. „Не можеме детали да откриваме, што е до наша страна ние на сите компании им го објаснивме проектот, повикот за прибирање понуди се уште трае. Пред една недела Индијците од Сахара груп беа во општината видно заинтересирани за проектот, но тие дознале за него откако беше објавен повикот па им беше краток рокот да ја подготват документацијата. Иако замолија да го одложиме тендерот за на пролет, ние сепак не можеме тоа да го направиме“, објаснува Јован Ѓорѓијоски, градоначалник на Сопиште. Инаку, според објавата, Сончев Град треба да се гради на локација од 835. 619 метри квадратни, чија почетна цена изнесува 1,6 милиони евра, или почетната цена на метар квадратен е 2 евра. Според наведените услови идниот инвеститор на локацијата треба да изгради најмногу индивидуални куќи или 51% од објектите треба да бидат куќи, а  помал дел или 9% да бидат станбени згради. Ќе се градат и јавни институции, трговски центри, бензински пумпи, училишта, објекти за рекреација...Сите заинтересирани инвеститори за да учествуваат во наддавањето мора да поднесат банкарска гаранција од 500 илјади евра. Доколку се продаде земјиштето, Сончев град треба да види бел ден дури по шест години. „Јас сум оптимист дека овој пат ќе успееме да најдеме инвеститор за Сончев Град. Парите под продажбата на земјиштето, комуналиите и данокот ќе бидат значаен импулс за општината која сега нема никакви приходи и е блокирана“, вели Ѓорѓијоски. Инвеститорот е задолжен за изградба на инфраструктурата, додека обврска на општината е да изгради пат од Водно до Сопиште и да го изгради водоводот до Патишка река. Тоа се проекти кои општината ќе ги финансира заедно со Владата. Идејата за Сончев град е стара веќе 6 години и до сега има поминато неколку фази на тендери и продажба. Во 2006 година со непосредна спогодба, пред избори тогашната Влада ја продаваше локацијата на германската компанија Бихард Констракшн Интернешнал, но Антикорупциската комисија го стопира процесот со образложение дека  за време на изборната кампања не смее да се продава државен имот. Во 2007 година пак, министерот за транспорт и врски Миле Јанакиески повторно го понуди на тендер земјиштето за Сончев град,  на кој беше избрана израелската компанија ИБЦ. Според роковите од тендерот елитната населба требаше да биде изградена до 2011 годинa. Но, во 2008 година поради сомневања за наместен тендер, пропадна и таа зделка.