УЧИЛИШТАТА ЌЕ ГИ ДЕЛАТ СВЕДИТЕЛСТВАТА НА 1. СЕПТЕМВРИ: Да се намали ризикот од ширење на вирусот

Добивај вести на Viber

Министерството за образование и наука во текот на вчерашниот ден донесе одлука сведителствата за оваа учебна година да бидат доделени на учениците на 1.септември на стартот на новата 2020/2021.

Првично, учениците требаше да си ги земаат оценките на 26. јуни, но поради актуелната криза со корона вирусот и со се поголемиот број на новозаразени, оваа завршна активност на училиштата се одложува за од септември.

Дел од родителите со кои разговараше Фактор велат дека ова е сосема исправна одлука заради заштита на граѓаните од корона вирусот, и покрај тоа што училиштата имаат протоколи и спроведуваат превентивни мерки.

-Децата беа помалку разочарани што сега нема да си ги видат петките во сведетелствата, но јас како родител сметам дека ова е одлучен чекор на властите. Ќе се причека до септември, и онака во моментов тие документи не се итно потребни. За разлика од оние кои завршија девето одделение и матурантите на кои им се потребни документите за прием на факултетите, помалите може да почекаат да се радуваат на оценките, вели за Фактор, Весна Дамева, родител.

Сепак, според одлуката на Министерството за образование, сведетелствата ќе бидат издадени на оние ученици кои имаат потреба да се префрлуваат од едно училиште во друго, но за ова ќе треба претходно да се најават и да секако да ги преземат сите мерки за заштита при земање на сведетелствата.