26 Ноември, 2022
0.0229

УНИШТЕНИ НАД ТРИ ИЛЈАДИ СВИЊИ, непопуларна мерка неопходна за спас на свињарството и масовно ширење на африканската чума

Објавено во: Агробизнис 30 Септември, 2022

Добивај вести на Viber

Над три илјади свињи се уништени во земјава со цел спречување на ширењето на африканската чума од која најмногу заболуваат и страдаат токму свињите. Од моментот на утврдување на првиот случај на заболено животно со оваа болест, борбата за воведување на мерки кои ќе го спречат нејзиното ширење, меѓу кои и нивното уништување, создава револт кај одгледувачите, кои се сообраа на протест. 

Последните податоци кои ги објави Агенцијата за храна и ветеринарство, велат дека во земајва досега поради оваа опака болест се уништени 3.304 свињи. 

Болеста африканска чума кај свињите досега е потврдена во населени места во општините Делчево, Македонска Каменица, Кочани, Виница, Чешиново - Облешево, Штип и Карбинци. Според последните податоци на Агенцијата за храна и ветеринарство, спроведени се мерки за депопулација на 3.304 свињи. Од нив, 3.171 се еутаназирани, а 133 се економски искористени со колење во кланица - посочија за Фактор од АХВ.

Африканска чума е вирусно заболување кај домашните и дивите свињи кое предизвикува големи економски загуби во свињарството, сточарска гранка која во изминативе години бележи развој. Зависноста од увоз на свежо свинско месо е намалена, односно, Македонија, сега целосно ги задоволува потребите од свежо свинско месо од домашно производство.

- Африканската свинска чума е болест која брзо се шири и предизвикува големи економски штети. Се уште нема вакцина, односно станува збор за болест која не се лекува. Се пренесува и шири со директен контакт помеѓу здраво и болно животно, трупови од угинати животни и луѓе, индиректно се пренесува преку заразена храна и отпадоци од храна, опрема, возила и облека, биолошки пренос од векторот - мек крлеж од родот Ornithodoros. Главните видови на животни кои се приемчиви на вирусот на африканска чума се домашните свињи, Европската дива свиња и Американски диви свињи, африкански диви свињи и крлежите  - објаснуваат од АХВ

Од Агенцијата додаваат дека од исклучително голема важност е одгледувачите на свињи (комерцијалните фарми, но и селските домаќинства) да имаат имплементирано висок степен на биосигурносни мерки, но и да ги почитуваат донесените решенија за спроведување на контролни и заштитни мерки за болеста и препораките. 

- Имајќи во предвид дека африканската свинска чума е болест која нанесува големи економски загуби во свињарството, уште во 2017 година, кога болеста зема замав во Европа и во регионот, АХВ почна со превентивни активности. Воведени беа задолжителни биосигурносни мерки на сите свињарски фарми, се спроведоа задолжителни клинички прегледи на одгледувалиштата со свињи, се вршеше засилен отстрел на диви свињи, а спроведени беа и голем број на едукации, почнувајќи од официјалните ветеринари, ловните друштва и одгледувачите на свињи, со цел полесно препознавање на болеста. Со појавата на првото жариште во делчевското село Драмче, во јануари годинава, но и по појавата на нови жаришта на болеста, мобилизирани се сите релевантни служби, со цел непрекинато и непречено спроведување на мерките за контрола и спречување на ширење на болеста, односно за појава на нови жаришта - потенцираат од АХВ.

Како што е веќе познато оваа болест не е зооноза, високо заразна е за домашните и дивите свињи кои се сметаат за главен резервоар на болеста. Болеста не влијае на здравјето на луѓето, односно не се пренесува на луѓето, туку обратно, луѓето можат да бидат нејзини преносители.

- Поради ова апелираме на крајна внимателност од страна на одгледувачите на свињи во комерцијалните фарми и индивидуалните домаќинства, но и од страна на ловџиите кои доколку одгледуваат свињи или работат на фарми со свињи, вирусот од дивата популација можат да го внесат и на фармите. Во однос на консумирањето на месо, безбедно е месото кое е термички обработено, односно она кое го минало соодветниот термички третман во преработувачките капацитети - потенцираат од АХВ.

Упатените укажуваат дека болеста треба сериозно да се свати, но и останатите проблеми кои се надвиснати над секторот свињарство, со цел истиот да биде спасен од негативни тенденции, особено од намалување на бројот на свињи. 

- Свињарството покрај африканската чума е на удар и поради растот на цените на енергентите и на добиточната храна. Треба да се посвети внимание на секторот, бидејќи по претходните мерки, производството се стабилизираше, па дури произведува доволно свежо свинско месо за потребите на земјата. Затоа е многу значајно оваа гранка да се сочува од негативните удари. Потребен е сериозен пристап и таргетирани мерки кои ќе овозможат зачувување на домашното производство, и државата треба да земе предвид се што се случува во овој сектор. Со таргетирани мерки да се сочува ова што го имаме, бидејќи може да биде сериозен удар и за фармите и за малите производители. Ако болеста се прошири, но и од поскапените импути како енергијата и храната, може да биде силен удар врз малите производители кои може да изгубат многу, па дури и бизнисите да ги загубат што ќе влијае и врз социолошкиот аспек, бидејќи тие нема да можат веднаш да сменат професија, или пак да го обноват бројот на свињи кои го чувале. За жал, обновата оди многу тешко. Загубите можат да бидат големи воопшто за целиот сектор свињарство - укажува професорот Драги Димитриевски од Факултетот за земјоделски науки и храна. 

П.О. 

Наградата се доделува на котирано друштво, избрано со гласање преку онлајн анкета на веб страниците на Берзата и интернет порталот „Фактор“, кој е партнер на Берзата во доделувањето на оваа награда. Гласањето се врши паралелно на двете веб страници и акцијата на издавачот што ќе има најмногу гласови од двете анкети збирно, ќе биде прогласена за Акцијата на годината по избор на јавноста за 2022 година.
Предмет на анкетата е листа од десет котирани акции, избрани врз основа на остварениот промет и транспарентноста во нивното работење.