Уште една шанса за елитна населба Зајчев рид, општина Карпош ќе носи нови урбанистички планови

Добивај вести на Viber

Новите детални урбанистички планови за населбата Зајчев рид поминаа на јавна анкета во општина Карпош, а веќе во тек е процедурата за нивно донесување. Долгонајавуваната елитна населба Зајчев рид најверојатно ќе види бел ден по донесување на двата нови детални урбанистички планови од страна на општина Карпош. Идејата за изградба на луксузна населба зад Управата за хидрометеоролошки работи најпрво треба да се реализира со продажба на државното земјиште, кое пак, зафаќа само 15% од вкупната локација кај Зајчев рид. Остатокот го поседуваат приватни лица. „Процедурата за донесување на ДУП за Зајчев рид 1,2 и 3 и 4 е во тек. Поминати се на јавна анкета. Како и кога ќе се гради населбата ќе зависи од сопствениците на земјиштето или од евентуални инвеститори. Најголем дел од земјиштето е во приватна сопственост, не е државно, така што самите сопственици си одлучуваат за градењето“, вели Виолета Цветковска, портпарол на општина Карпош Идејата за изградба на елитната населба Зајчев рид датира уште од 2007 година кога локацијата во деталниот урбанистички план на општина Карпош беше пренаменета за изградба на елитна бизнис населба по светски стандарди. Но, нејзината реализација досега ја кочеа нерешените имотно правни односи и тоа што најголем дел од земјиштето е во приватна сопственост. Било кој инвеститор да реши таму да гради ќе треба да преговара со многу луѓе за да купи само една парцела. Затоа општината реши да направи измени на урбанистичкиот план за Зајчев рид,  со кои се врши репарцелизација на теренот, со цел граѓаните да можат полесно да ги оформат градежните парцели, во приватна сопственост. Со продажбата на земјиштето во државна сопственост ќе раководи општина Карпош, но цената за земјиштето се уште не е утврдена. Висината најверојатно ќе ја определи Владата. Зајчев рид, елитна населба во која дневно може да гравитираат и до 24.000 луѓе Според првичните најави, зад објектот на Управата за хидрометеоролошки работи, на локалитетот Зајчев рид, треба да се гради нова елитна населба со резиденцијални куќи со дворови, два плоштада, хотел, болница, црква, и уште многу други објекти. Атрактивната градежна локација Зајчев рид се простира на површина од 150 хектари. Станува збор за стотина градежни парцели, а според проектантите населбата може да поднесе дневна гравитација од 24 илјади луѓе. Локацијата има простор и за изградба на спортски објекти од отворен и затворен тип како и за изградба на мали, елитни мини населби. Во населбата, според првичниот план, предвидено е да се влегува од четири места, од Момин Поток,од Качанички пат, булеварот Словенија како и од потегот што води кон населбата Бардовци С.Н.