УСПЕХ ЗА МАКЕДОНЦИТЕ ВО АЛБАНИЈА: Табла која содржи македонски јазик ќе биде поставена во Тирана

Добивај вести на Viber

Табла која содржи македонски јазик ќе биде поставена во албанскиот главен град Тирана по барање на Македонското друштво „Илинден“. 

По барањето на Македонско друштво „Илинден“ – Тирана повеќејазична табла, вклучително и на македонски јазик и неговото кирилско писмо, ќе бидe поставена на зградата каде е сместен Комитетот за национални малцинства во албанската престолнина. 

„Ова е уште еден успех на нашето друштво и за сите Македонци во Албанија, но и другите малцинства. Комитетот за национални малцинства е владина институција во која членуваат претставници од сите признати национални малцинства. Сега како што сме официјално информирани натписот на институцијата ќе биде повеќејазичен, што значи и на македонски јазик и неговото кирилско писмо“, изјави за МИА Никола Ѓурѓај, претседател на друштвото.

Потсетува дека друштвото на 31 јануари лани доставило барање до Комитетот за поставување на повеќејазична табла, а по десетина дена добило позитивен одговор.

„Но, помина повеќе од една година, а таблата не беше поставена. Поради тоа на 25 април годинава испративме  реакција до повеќе институции во Република Албанија, меѓу кои и до Народниот правобранител. Народниот правобранител го разгледа барањето, излезе во пресрет и се ангажираше да се постави повеќејазична табла на зградата на Комитетот“, вели Ѓурѓај.

Изразува голема благодарност до Народниот правобранител и вработените во таа институција, за нивното ангажирање за конечно да биде поставена повеќејазична табла.