Вардар се крена за половина метар, хидроелектраните се исклучуваат да се намали опасноста
Објавено во: Македонија 26 Јануари, 2023
АД ЕСМ синоќа информираше дека е исклучена хидроцентралата Св. Петка, додека производството во ХЕЦ Козјак е контролирано на минимум, со цел намалување на нивото на реката Вардар. Не работи и хидроелектраната Матка која е во сопственост на ЕВН.
Центарот за управување со кризи претходно алармираше дека на некои места нивото на реката е зголемено за половина метар и дека надоаѓа до некои населени места.
„По информацијата за покаченото ниво на реката Вардар, во координација со ЦУК, од страна на АД ЕСМ е пристапено кон промена на режимот на работа на хидроелектраните во склоп на хидросистемот Треска. Намалено е производството на електрична енергија од хидроелектраната Козјак, каде е оставен во функција само еден агрегат, додека хидроелектраната Св. Петка е надвор од употреба“, информираше ЕСМ.
Во текот на ноќта се очекуваше стабилизирање на дотоците, а загубеното производство на електрична енергија ќе се надополни од другите капацитети.