Видео: Арнаудов ја „турка“ Народна кон ДПМНЕ, а во април тврдеше дека во коалиција се губи суверенитетот

Добивај вести на Viber

Ламбе Арнаудов останува на ставот дека Народна партија треба да се припои кон ДПМНЕ со кои го делат заедничкиот префикс ВМРО. Арнаудов прв откри дека од ДПМНЕ пристигнал одличен предлог со кој на „народњаците“ би им следувале високи позиции и тоа е голема шанса за партијата. 

- Не можам да кажам што конкретно содржи пакет-понудата што ја договорив во преговорите со ВМРО-ДПМНЕ, но таа е сосема коректна, и тоа не за раководството на партијата, туку за целото членство. Воедно, оваа понуда е се уште актуелна и верувам дека ќе биде прифатена од партиските органи и нашата партија ќе оствари соработка со ДПМНЕ на следните избори, изјави Арнаудов за Фокус.

Претходно Љубчо Георгиевски посочи ако тој самиот се прашува тогаш НП треба сама да излезе на избори но, бидејќи се задржа стариот систем на шест изборни единици смета дека не може да се оствари добар изборен резултат, па мора да се припојат на некоја коалиција.

На извршниот комитет на партијата начелно било договорено да се коалицира со десничарскиот опозициски фронт на заеднички листи каде се повеќе мали партии како ФРОДЕМ, Демоктратски сојуз, МОРО, а се чека на потврда на Обединети на Љубе Бошковски и Достоинство на Стојанче Ангелов.

Да потсетиме дека во април Арнаудов на дискусија на Цивил посочи дека малите партии кои се послушници на големите четири партии ја уназадуваат демократијата и тврдеше дека НП не е врзана со ниту една друга.