(ВИДЕО) НАЈМАЛКУ 18 ЛУЃЕ ЗАГИНАА: Русија ги нападна Киев, Одеса, Дњепропетровск, Харков и Лавов
Објавено во: Свет 29 Декември, 2023
Најмалку 18 загинати и 130 повредени има во нападите во Украина. Русија изврши напад врз украински градови со проектили и беспилотни летала.
Беспилотни летала и проектили ги погодија градовите Киев, Одеса, Дњепропетровск, Харков и Лавов во раните утрински часови.
„Денес, милиони Украинци се разбудија од силниот звук на експлозии. Посакувам овие звуци на експлозии во Украина да се слушнат низ целиот свет“, напиша министерот за надворешни работи Дмитро Кулеба на платформата X.
Тој ги повика сојузниците да продолжат со воената помош за Киев.
Портпаролот на украинските воздухопловни сили Јуриј Игнат изјави дека Русија користела хиперсонични, крстаречки и балистички ракети, вклучувајќи го и типот Кх-22, кои се исклучително тешки за пресретнување.
Претседателот на Украина, Володимир Зеленски објави дека биле истрелани 110 ракети во еден од најмасовните напади од почетокот на војната. Според војската, имало 158 проектили и беспилотни летала.
Полската оперативна воена команда извести дека рано утрото неидентификуван воздушен објект влегол на територијата на Полска од Украина.
„Русија нема да престане да ја напаѓа Украина“, напиша холандскиот премиер во оставка Марк Руте на социјалната мрежа „Х“, пренесе холандската агенција АНП.
Шефот на европската дипломатија Жозеп Борел оцени дека Русија ноќеска извела „уште еден кукавички напад“.
Руската инвазија на Украина почна лани на 24 февруари.