Родителите од Кочани бараат нови мерки откако го начекаа кандидатот на ВМРО-ДПМНЕ во кафеана со Димитровски

Добивај вести на Viber

Родителите на загинатите од дискотеката Пулс вчера (21.10) поднеле Барање до Кривичниот суд и обвинителството за определување на построги мерки на претпазливост за поранешниот градоначалник на Кочани, Ратко Димитровски, еден од 34-та обвинети за пожарот во дискотеката Пулс, откако беше затекнат во кафеана со кандидатот за градоначалник на Кочани од ВМРО ДПМНЕ, Владко Грозданов.

„Поднесовме предлог барање за определување на други мерки на претпазливост на обвинетиот Ратко Димитровски, бидејќи тој има забрана за приближување или воспоставување контакт на лице кое се јавува во својство на оштетен, во случајот Владко Грозданов. Не знам како можеле баш во тој час кога ние родителите имаме протестен марш и ги носиме сликите на нашите загинати деца, тие баш во тој момент да излезат во кафеана. Досега толку време не работеле институциите, сега не знам дали проработела свеста на граѓаните, но сега по последните случувања се гледа дека не е допрено до многу, изјави Светлана Илиевска Стојанова, мајка на загинатиот Андреј Стојанов во синоќешното издание на „На претрес со Ландов“.

За родителите на загинатите спорно е тоа што Владко Грозданов е татко на дете со тешки телесни повреди стекнати во катастрофалниот пожар во дискотеката Пулс, па тој во судскиот процес за пожарот се јавува како оштетена страна, а обвинетиот Ратко Димитровски има активна мерка „забрана за приближување или воспоставување на контакт со лице кое се јавува во својство на оштетен“.

Освен правниот аспект, родителите на загинатите сметаат дека средбата има и сериозен проблем од етички аспект. Како што рече Илиевска Стојанова, за нив не е во ред тоа што обвинетиот Димитровски и кандидатот за градоначалник Грозданов одлучиле да седнат во кафеана во истото време и на рутата на протестниот Марш за ангелите во саботата, на 18 октомври, во предизборниот молк.

Додека минуваше протестниот марш покрај кафеаната, а Димитровски и Грозданов беа седнати на маса до стаклото на објектот, учесниците на протестот тоа го сфатија како провокација, па триесетина луѓе влегоа внатре и вербално се конфронтираа со Димитровски и Грозданов, по што Грозданов се повлече во помошна просторија на објектот, а Димитровски се соочи со родителите до пристигнување на полициски службеници, по што со полициска асистенција беше затворен ходникот по кој Димитровски замина од објектот.