(ВИДЕО) Стоилковски: Никогаш не сум промовирал сексизам
Објавено во: Македонија 04 Септември, 2019
Наум Стоилковски, портпаролот на ВМРО-ДПМНЕ, изјави дека неговите навредливи зборови за новата министерка за финансии Нина Ангеловска биле разбрани во поинаков контекст, а поентата му била друга.
„За оние кои што не разбраа и потпаднаа на извитоперувањето на мојот став: Никогаш не сум промовирал сексизам ниту тоа е дел од мојот карактер и светоглед. Напротив реагирам на прес на кој што Заев ја злоупотреби Нина како лице за промоција на неговиот ребаланс, што го покажува неговиот однос и кон министерството и кон министерката. Жалам ако некој е доведен во заблуда со извитоперувањето на мојот став“, изјави денеска гласноговорникот на најголемата македонска опозициска партија.
Стоилковски сепак се послужи со зборови како „Нина Групировка“ и „Џирло девојка“, по што наиде на жестоки реакции во јавноста, особено кај феминистите, па дури и кај пратенички од неговата партија.
„Излезе Заев со Нина Групировка за да си го претстави за Ребалансот.
Таа тргна барем да одговори прашање; тој го презеде микрофонот!
Сега е јасно дека со финансии министерува Заев, а Нина е Џирло Девојка- презентерка за владините Светлечки Јојоа и Стомак елиминатори.
Ова е комплетно киднапирање на институции!“, објави вчера Стоилковски на социјалните мрежи.