(ВИДЕО) Турција ја очекуваат промени – Ердоган е новиот претседател

Добивај вести на Viber

Досегашниот турски премиер Реџеп Тајип Ердоган станува нов претседател на државата, откако убедливо во првиот круг победи на денешните претседателски избори во земјата. По преброени 99% од гласовите, Ердоган освоил тесно апсолутно мнозинство од 51,5% од гласовите, со што сепак го помина потребниот праг од 50% плус еден глас за победа во првиот круг. Неговите противкандидати освоиле далеку помалку - опозицискиот кандидат Екмеледин Ихсаноглу добил 38,9%, а курдскиот кандидат Селахатин Демирташ - 9,5% од гласовите. Во скапа кампања која траеше цели три месеци, Ердоган најави широки уставни промени со кои има намера да го промени политичкиот систем на земјата и значително да ја зајакне претседателската функција. Прв чекор во таа насока беа токму овие избори на кои турските граѓани за првпат директно го избираа шефот на државата. Според најавите на Партијата на правдата и развојот на Ердоган, во иднина Турција од парламентарна демократија би требало да премине  на мешовит полу-претседателски систем каков што има Франција, со нагласена улога на шефот на државата. Ердоган по победата изјави дека „турскиот народ ја покажа својата волја“ и додаде дека „народот донесе важна одлука за турската демократија и за иднината на земјата“. Според најавите, Ердоган има намера откако официјално ќе ја преземе претседателската функција, премиерската да му ја довери на досегашниот шеф на дипломатијата Ахмет Давутоглу. Тој важи за негов близок соработник, па познавачите коментираат дека на овој начин Ердоган ќе си обезбеди контрола и врз турската влада. http://www.youtube.com/watch?v=d5bLTLcmVhM