Виктор Стојанов: Кадриески ќе се врати во Македонија за да ја продолжи борбата за човековите права на Бугарите
Објавено во: Македонија 20 Јуни, 2023
Бекир Кадриески кој неодамна стана познат во јавноста по тепачката која се случи во Струга, се враќа во градот за да се бори за Бугарите и засега нема да добие привилегии како што доби охриѓанецот Христијан Пендиков.
Kопретседателoт на бугарското здружение во Струга „Шемето“, Бекир Кадриески е во добра состојба. Тој се сликаше со Виктор Стојанов, основачот на фондацијата Македонија кој има забрана за влез во земјава.
„Бекир Кадриески е добро и наскоро ќе се врати во Северна Македонија за да ја продолжи борбата за човековите права на Бугарите во Македонија. Напаѓачот на Бекир Кадриески не е обвинет за тепањето што му го нанел и е во бегство. Ова е државата Северна Македонија. Нема да има правична истрага, како што бара Министерството за надворешни работи на Бугарија“, пишува Стојанов.
Оваа тепачка доби етнички предзнак по изјавата на Кадриески дека напаѓачот го нарекол „валкан Бугарин“. Полицијата објави дека станува збор само за нарушување на јавниот ред и мир и дека нема дело, но ќе има соодветен поднесок. Бугарските власти ја осудија тепачката.
Кадриески бараше лекување во Бугарија и доби третман. Пред неколку месеци, во Охрид три лица го нападнаа Христијан Пендиков, кој потоа кажа дека добил навреди затоа што се изјаснува како Бугарин. Бугарските власти со владин авион го однесоа на лекување во Софија. Пендиков доби бугарско државјанство, но и стипендија за да се школува во Бугарија. За овој случај се води судски процес.