Висока невработеност, мали плати и големи одговорности за македонските жени

Добивај вести на Viber

Стапката на вработеност кај жените е ниска,  оние со високо образование тешко стигнуваат на раководни функции, а и платите на жените сеуште се значително пониски од оние на мажите во Македонија, стои во извештајот на Парламентарното собрание на Советот на Европа (ПССЕ) за родовата еднаквост во земјите од поранешна Југославија, кој беше денеска презентиран во Париз. Извештајот нотира дека стапката на вработеност на жените во 2008 година во Македонија е 32,9 отсто додека кај мажите е 50,7 отсто. Од активното население, 76,6 отсто од мажите се активни, наспроти само 50,2 отсто од жените, а мажите земаат и за најмалку 20% повисока плата. Во 2010 година пак, според Светската банка, годишната плата на една жена во Македонија изнесува 5.956 американски долари, а кај мажите 12.247 долари. Извештајот посочува дека дискриминацијата е најприсутна кон жените Ромки, кои се лишени од образование, работа, здравствена заштита, а според проценките на Амнести интернешнел, дури 66 отсто од жените Ромки во Македонија можат да најдат работа само на „црно“. Од  Парламентарното собрание на Советот на Европа посочуваат и дека владите во земјите од поранешна Југославија се справуваат со економската и политичката ситуација без притоа да ја интегрираат родовата димензија и дека за помалку од десет години постигнат е сериозен напредок со воведувањето на законска рамка за усогласување на домашните закони со европските и меѓународните норми, но родовата еднаквост е се уште далеку од реалноста. Оттука, од ПССЕ забележуваат дека одговорностите на жените во семејствата се поголеми од тие на мажите, жените од руралните средини се повеќе маргинализирани од жените од урбаните средини, жените почесто имаат работни договори на одредено време, што дозволува да се избегне правото на породилно отсуство кое постои во законите и сексуалниот мобинг е многу раширена и малку казнувана практика.