Владиниот тим ги повика Бразилците да инвестираат во Македонија

Добивај вести на Viber

На бизнис-форумот во градот Куричиба, федерална држава Парана,  владиниот тим кој е во посета на Бразил ги повика инвеститорите да дојдат во земјава. Премиерот Никола Груевски се сретнал со раководниот менаџмент на Стопанската комора на Парана, на бизнис форумот каде што присуствувале претставници на компании од областа на информатичките технологии, агробизнисот, земјоделството и туризмот, соопшти владината прес-служба. „Бразил е голема економија, а бразилските компании се повеќе стануваат големи играчи на светските пазари. Има многу бразилски компании кои ги имаат надминато границите на Бразил и Јужна Америка и бараат нови пазари во Европа и други делови на светот. Ние се обраќаме на тие компании, доколку сакаат да влезат на пазарот на Европа, Република Македонија со поволностите кои ги нуди е вистинската дестинација за таков исчекор. Во мојата земја бизнис-компанија може да се отвори само за 4 часа, процедурите за градење на објектот се реализираат во три наместо во поранешните 21 чекор, а државата дава и државна помош за изградба на капацитетот во вредност до половина милион евра“, изјавил македонскиот премиер пред инвеститорите. Според вицепремиерот Зоран Ставрески,  македонија може да се искористи како дестинација од која бразилските компании би можеле со свои капацитети да ги покријат и брзорастечките пазари на Русија, Турција и арапските земји. „На тој начин значително ќе се намалат трошоците на компаниите за транспорт, кои претставуваат значаен дел од вкупните трошоци на производите, а нема да имаат и обврска за плаќање на данок на додадена вредност и царини за инпутите во производството кои ќе ги користат за изработка на своите производи кои одат за извоз“, посочил вицепремиерот Ставрески. Владината делегација продолжува во посета на Аргентина, каде што во главниот град Буенос Аирес ќе бидат остварени повеќе политички и економски средби и настани.