Влегуваат 50,3 милиони евра за нови патишта и железница, Коридорите 8 и 10 се приоритет

Добивај вести на Viber

Со вкупно 50,3 милиони евра од третата компонента на ИПА-фондовите за периодот 2012 - 2013 ќе се  гради железничка и патна инфраструктура во Македонија. Средствата и се веќе и официјално на располагање на Македонија, а треба да се потрошат најдоцна до 2017 година, информираше министерот за транспорт и врски Миле Јанакиески. „На веб-страницата за тендери на Европската унија денеска е распишана објава за подготовка на основен проект и тендерска документација за изградба на нова железничка делница од Кичево до границата со Република Албанија како дел од Коридорот 8. Со тоа практично почнува постапката за избор на консултант“, изјави Јанакиески. Во делот железници, додаде министерот, приоритет ќе има и изработката на главен проект и тендерска документација за изградба на делницата Крива Паланка - граница со Република Бугарија, исто така како дел од Коридорот 8. Предвидени се и проекти за изготвување проектна документација за железничките делници Скопје - Кичево и Велес - Битола, како и основен проект за делницата Драчево - Велес. Во делот патишта е предвидена рехабилитација на патните делници по должините на Коридорот 10 и 10 д,  како и Акциски план за подобрување на безбедноста на патиштата по должина на Коридорите 8 и 10. И делниците Миладиновци - Скопје, Куманово - Миладиновци, Меџитлија - Крклино, Крклино - Прилеп и Градско - Неготино ќе бидат опфатени со Оперативната програма. Инаку договорот треба да биде склучен во втората половина на 2013 година со времетраење од 24 месеци и буџет во износ од осум милиони евра.