ВМРО-ДПМНЕ и Беса ги надгласаа СДСМ и ДУИ во Собранието
Објавено во: Македонија 29 Јули, 2019
ВМРО-ДПМНЕ со помош на пратеникот на Беса, Фадил Зендели, ги надгласаа членовите на СДСМ и ДУИ во Комисијата за избор и именување во Собранието, на лија седница требаше да се гласа за промена, односно за нови директори на неколку јавни институции кои сега се раководени од директори поставени од претходната власт.
Опозицијата сега има мнозинство во Комисијата преку која одат именувањата на функционери што се во надлежност на Собранието. Оваа комисија и досега често беше блокирана затоа што мнозинството при формирањето на комисиите го прифати барањето на ВМРО-ДПМНЕ претседател на ова парламентарно тело да биде Илија Димовски.
Инаку претходно имаше средба на лидерот на ВМРО-ДПМНЕ Христијан Мицкоски со претседателот на Беса, Касами за време на периодот кога требаше да се одржи лидерска средба, но истата беше откажана.
Денес два пати е одложена Комисијата за избор и именување, конкретно на директори и нивни заменици во неколку јавни установи на национално ниво, кои во моментов се предводени од раководства назначени од претходната власт.
Станува збор за назначување на нови директори на Комисијата за заштита на правото за слободен пристап до информациите од јавен карактер, Дирекција за заштита на лични податоци, Државна комисија за одлучување во управна постапка и постапка од работен однос во втор степен.