Во 2014 Грција ќе излезе од рецесијата, прогнозира ЕУ

Добивај вести на Viber

Грција во 2014 година конечно ќе излезе од седумгодишната рецесија, соопшти денеска Европската унија. Според прогнозите на ЕУ Атина во 2014 година ќе оствари економски раст од 0,6 проценти, а грчката економија дотогаш ќе се намали за околу една петтина во однос на предкризното ниво. - Пресвртната точка во рецесијата се очекува во втората половина на 2013 година, со што во 2014 година се предвидува скромен раст од 0,6 отсто, се наведува во прогнозата на ЕУ. ЕУ е поголем оптимист и од грчката Влада, која минатата недела објави дека очекува раст од 0,2 проценти во 2014 година, 2,5 отсто во 2015 и 3,5 проценти во 2016 година. Во соопштението на Унијата се наведува дека прогнозата се базира на враќање на довербата и инвестициите, кои зависат од ефикасни економски реформи, како и напредок во големите инфраструктурни проекти, кои се дел финансирани од фондови на еврозоната. Невработеноста во Грција годинава достигна 23,6 проценти, што е една од причините за рецесијата во земјата, заедно со владините мерки за штедење и лошата инвестициска клима.