Во едно од возилата на Косово се најдени документи од српски политичар

Добивај вести на Viber

Во едно од возилата од вчерашниот напад во северно Косово се најдени документи на потпретседателот на Српска листа, Милан Радојичиќ.

Министерот за внатрешни работи на Косово, Џељаљ Свечља ја соопшти оваа информација.  Радојичиќ е на црната листа на САД, но и е осомничен за убиството на косовско-српскиот политичар Оливер Ивановиќ, јави дописникот на МИА од Приштина.

На прес-конференцијата на која го презентираше арсеналот оружје, униформи и логистичка опрема што косовската полиција ги заплени на север, Свечља изјави дека тоа ја докажува поврзаноста или директното учество на Радојичиќ во нападот врз косовската полиција вчера во раните утрински часови, каде е убиен полицаецот Африм Буњаку.

Свечља изјави дека локални и странски експерти потврдиле дека за толкаво количество вооружување и такви подготовки потребни се најмалку неколку месеци. Тврди дека Белград е нарачател на нападот. 

Кремљ соопшти дека внимателно ја следи „тензичната и политички опасна“ ситуација на Косово. ЕУ повика на смирување на тензиите меѓу Косово и Србија. 

Косовските власти велат дека шест од напаѓачите се лекуваат во Нови Пазар и бараат Србија да им ги предаде.