Во Европа се гради дрвен град: Првите станови ќе бидат готови годинава

Добивај вести на Viber

Градот на иднината се создава во предградието на Стокхолм - не од челик и бетон, туку од дрво. Шведската компанија „Атриум Љунгберг“ инвестира дури 12 милијарди шведски круни (околу 1,25 милијарди долари) во создавањето на најголемиот проект за дрвена градба во светот.

Новиот градски кварт Сикла, сместен јужно од центарот на главниот град, се гради со вкрстено ламинирано дрво (CLT) и ќе се простира на површина од 250.000 квадратни метри. Дрвото се користи во сите делови од изградбата - од подови и ѕидови до потпорни елементи.

Поранешната индустриска зона Сикла, позната по производството на дизел мотори, сега се трансформира во модерна населба со дрвени станбени згради, канцеларии, училишта и продавници. Постојните постари згради нема да бидат урнати - некои од нив веќе се претворени во библиотеки и кина, а новите згради ќе се вклопат во постојната урбана структура.

Раководителот на одделот за развој на бизнисот во компанијата, Хокан Хиленгрен, вели дека проектот има јасна цел - да покаже како изгледа одржливата урбана иднина. Тој истакнува дека градежниот сектор произведува дури 37 отсто од глобалните емисии на стакленички гасови, што значи дека оваа индустрија има најголем потенцијал за промени.

Бројни студии ги потврдуваат предностите на дрвената конструкција. Според американска студија од 2024 година, дрвените згради произведуваат 81 отсто помалку емисии на стакленички гасови во споредба со бетонот, а 76 отсто помалку од челичните конструкции.

Не е случајно што Шведска ја предводи оваа промена - дури 70 отсто од нејзината територија е покриена со шуми, а дрвото се користи во градежништвото со децении.