Во Фиренца македонските претставници ќе учат како депонија да стане фабрика

Добивај вести на Viber

Делегација на Град Скопје и претставници на Министерството за животна средина и просторно планирање, два дена ќе претстојуваат во Фиренца на покана на концесионерот на депонијата „Дрисла” - конзорциумот составенод FCL Ambiente SRL и Unieso SCC Coop од  Италија.

За време на посетата, македонските претставници ќе се запознаат со начинот на работа кој треба да биде имплементиран во функционирањето на фабриката за преработка на отпадот во депонијата „Дрисла“. Градот Скопје со конзорциумот FCL Ambiente SRL и Unieso SCC Coop од Италија потпишаа договор за заедничко вложување во јавното претпријатие депонија „Дрисла“, со кој ова претпријатие треба да прерасне во  индустрија за екологија. Италијанскиот конзорциум со овој договор доби концесија за работа со „Дрисла“ со траење од 35 години. „Вкупната инвестиција за трансформирање на ЈП „Дрисла“ ќе изнесува 73 милиони евра, а вложувањето на средствата е планирано да се изврши во период од 4 до 5 години“ - велат од одделението за односи со јавноста и информации за граѓаните на Град Скопје. Со овој договор е предвидено депонијата да прерасне во индустрија за екологија, во која отпадот ќе се трансформира во енергија или гориво и репроматеријал, секундарна суровина, со што драстично ќе се намали количеството отпад што трајно ќе биде одложуван на депонијата и ќе има поголема искористеност на повторно обновливите делови.