Во Хрватска поголем данок за празни куќи

Добивај вести на Viber

Во април следната година Хрватска  ќе  воведе данок на имот за недвижнини, кои не се користат од сопствениците, а кој ќе изнесува два проценти. За становите кои се користат од сопствениците е предвиден данок од 0,2 отсто, а доколку ги изнајмуваат 0,4 отсто. Министерството за финансии појаснува дека стапката од два проценти ќе се пресметува за објекти кои не се во функција, како што се куќи или станови во кои никој не живее, а сопствениците не ги изнајмиле или за деловни простории, кои се празни. Тоа значи дека данокот на стан, чија вредност даночната управа ќе ја процени на сто илјади евра, а во кој сопствениците не живеат, ниту го изнајмуваат, годишно ќе изнесува околу две илјади евра. Доколку сопствениците живеат во тој стан ќе добијат 90 проценти попуст и ќе плаќаат само десет отсто од спомената сума, односно 0,2 проценти од вредноста на станот, што годишно во овој случај ќе изнесува 200 евра. Станот, кој сопствениците ќе одлучат да го изнајмат ќе добие попуст од 80 проценти, односно за него ќе се плаќа данок од 0,4 отсто од вредноста, што во споменатиот пример би изнесувало 400 евра. Со данокот на имот ќе се замени комуналниот надомест, кој досега се плаќаше, не според вредноста на станот, туку врз основа на неговата квадратура и во зависност од градската зона во која тој се наоѓа. Хрватскиот министер за финансии Славко Линиќ изјави дека богатите граѓани, кои во сопственост имаат по неколку станови или деловни простори ќе мораат повеќе да придонесуваат за образовниот систем, здравството, социјалната заштита и другите јавни потреби.