Во Македонија недостасуваат заварувачи,маркетинг-менаџери и машински инженери

Бизнис заедницата повторно апелира на проблемот од недостиг на квалификувана работна сила и покрај големата понуда на пазарот на трудот. Решавањето на овој проблем, што посебно ќе се изостри по четири до пет години, откако ќе заминат постарите кадри, треба да почне веднаш и не смее да се пролонгира беше речено денеска на прес-конференција во Стопанската комора.

Недостигот на знаење и вештини се клучните проблеми со кои се соочуваат компаниите, постои потреба за дополнително образование и усовршување,а некои од потребните занимања, воопшто не постојат во нашиот образовен систем, покажува анкетата што ја спроведува Стопанската комора на вкупно 150 фирми.

„ Анкетата почна пред три недели и се уште трае. Во наредните 20 дена се очекуваат информации од градежништвото, текстилната индустрија, дрвнопеработувачката и други по што ќе се направи целосен извештај за состојбата со квалификуваната работна сила во земјава“, рече Стојмирка Тасевска од Комората. Најдефицитарна струка во металопреработувачката и електроиндустријата е заварувач од сите типови, а причината за неможноста да се обезбеди ваков кадар, надуваат компаниите, меѓу другото е и недостатокот на работно искуство. Ретко се наоѓаат и бравари, монтери, одржувачи на водоинсталации, оператори на тешка градежна механизација и на кранови, металостругари. Во делот на високото образование недостигаат машински и градежни инженери, технолози, маркетинг-менаџери, контролори на квалитет, инженери за здравје и безбедност при работа, како и тим-лидери на продажба. За надминување и побрзо решавање на проблемот со немањето квалификуван кадар, во Македонија веќе се воведува систем на неформално образование. Целиот проект го координира Центарот за образование на возрасни кој издава лиценци на сите што ќе поднесат програми за ваков тип едукација. Стопанската комора воедно сугерира и предлага измени на формалното образование согласно потребите на пазарот.