Во Загреб паркингот поевтинува, во Скопје ќе поскапува?

Добивај вести на Viber

Градоначалникот на Загреб Милан Бандиќ ги израдува граѓаните со најави дека најдоцна за две недели значително ќе поевтини паркингот во хрватскиот главен град. Според најавите, намалувањето на цените најпрвин ќе важи во катните гаражи, а потоа и на сите паркиралишта. Бандиќ не најави колкаво ќе биде поевтинувањето, но нагласи дека се работи за значително намалување на цените со кое ќе бидат задоволни сите граѓани. „Ќе биде значително поевтино и тоа на сите нивоа - дневни, месечни, годишни, повластени карти во сите зони, бидејќи имаме намера целиот град да го претвориме во паркинг-зона со симболични цени за паркирање“, најави Бандиќ. Во Загреб во моментов еден час паркирање чини од 60-тина денари во најскапата прва зона, во која е дозволено паркирање од 2 часа, до најевтината тарифа од околу 16 денари во периферните делови од градот. Со ова просечната цена на паркирање изнесува околу 40 денари на час. Еве го ценовникот на Загребпаркинг, претпријатието кое управува со паркинзите: И со оваа цена паркирањето во Загреб не е многу поскапо од она во Скопје, каде што просечната цена изнесува 35 денари на час. Сепак, од ЈП „Градски паркинг“ - Скопје сметаат дека ваквите цени се прениски и оти треба да се зголемуваат. Зошто во Скопје „паркинг-математиката“ е различна? Ценовникот за паркирање по час на ЈП „Градски паркинг“ е одреден согласно местоположбата на паркиралиштата, односно зоните. Зоната А ги вклучува паркиралиштата во строгиот центар на градот, каде што цената за еден час паркирање изнесува 45 ден, во зоната Б е 35 денари, во зоната Ц и во зоната Д е 25 денари за еден час, што значи дека просечната цена изнесува 35 ден. „Цените за паркирање во Скопје не се променети од 2008 година и оттогаш нема нивно покачување. Во тие цени, покрај услугата, пресметан е трошокот за ДДВ од 18 отсто, како и комунална такса од 10 отсто, што значи дека околу една третина од вкупната цена се други трошоци“, велат од „Градски паркинг“. Но, вредноста на часот паркирање во македонскиот главен град уште повеќе се зголемува, доколку при пресметката се земе предвид и нискиот животен стандард на македонските граѓани. Весникот „Нова Македонија“ неодамна ги спореди цените за паркирање во Скопје со оние во останатите европски метрополи, но согласно животниот стандард на населението и дојде до заклучок дека споредено со месечните приходи, скопјани плаќаат поскап паркинг:                                                                                                                                                                              Извор: Нова Македонија Сепак, од ЈП Градски паркинг - Скопје сметаат дека цените на паркингот не можат да се поистоветат во целост со примањата на граѓаните, туку целта и цените на паркирање треба да придонесат и за растоварување на сообраќајот и за намалување на загадувањето на воздухот. Билјана Арсовска