„Воинот на коњ“ ќе се преименува во „Александар Македонски“

Добивај вести на Viber

Споменикот посветен на Александар Македонски на плоштадот Македонија во Скопје ќе добие плоча дека е паметник од хелинистичкиот период и култура, но ќе добие промена на официјалниот назив кој сега гласи „Воинот на коњ“, информираше денеска на прес-конференција портпаролот на Владата Миле Бошњаковски.

- „Воинот на коњ“ ќе го преименуваме во тоа што вистински е – Александар Македонски и ќе дадеме објаснување во рамки на споменикот за што станува збор односно „Александар Македонски како дел од хеленскиот антички период и како светско културно наследство“, истакна Бошњаковски.

Според него, овој споменик нема да се урива туку тој ќе остане како симбол на пријателство помеѓу Република Македонија и Република Грција.

„Истото ќе се случи и со споменикот на Филип Втори и споменикот на Олимпија. Сите евентуални решенија за спомениците кои се од светското цивилизациско наследство ќе бидат во насока на потврдување на пријателството помеѓу Македонија и Грција. Едно е сигрно ние нема да се срамиме спомениците да ги нарекуваме така како што се“, рече Бошњаковски.

Посочувањето на хеленската култура, како историско и цивилизациско наследство на светот, на споменици од „Скопје 2014“ е предвидено со договорот што го постигнаа премиерите Зоран Заев и Алексис Ципрас за спорот со името.