Добивај вести на Viber
Со поставување камен темелник, по втор пат, започна изградбата на слободната економска зона Тетово. Лопати со бетон фрлија покрај премиерот Никола Груевски , фрлијаи лидерот на ДУИ Али Ахмети и министерот за економија Ваљон Сарачини.
Со зоната следните 96 години ќе менаџира норвешко-македонската фирма „Нормак инвест груп“, како јавно-приватно партнерство. Притоа македонските власти се обврзани да ја направат клучката на автопатот Тетово - Скопје за да има директен пристап до зоната.
Во однос на фактот што вторпат се отвора истата зона, која беше најавена и почна да се гради пред три години, надлежните за застојот се правдаат со имотно правни проблеми на локацијата.
„Тетовската економска развојна зона е основана во 2010 година. Во меѓувреме се јавија проблеми од имотно-правен карактер. Овде има услови за изградба на фабрики. Местоположбата сосема одговара оти е близу до Албанија, Косово и Србија. Зоната ќе биде отворена за многу инвеститори“, посочи Груевски.
За министерот Сарачини, овојпат работите ќе течат по планот.
„Ние бевме сигурни дека ќе се реализира и баравме сериозни инвеститори. Почнуваме голем проект, кој прв пат ќе се развива со јавно приватно партнерство и во оваа зона ќе се градат капацитети кои ќе произведуваат за светски пазари“, вели Сарачини.
Во оваа зона ќе се вложат околу 7 милиони евра, ќе се работи во три фази и сите работи треба д асе готови за 7 години.Штом ќе завршат инфраструктурните работи , надлежните најавија дека ќе почне и изградбата на производни и услужни капацитети.
Според Висар Фида, директор на Агенцијата за странски инвестиции, при крај е потпишувањето договори за три компании од Норвешка, Албанија и Турција кои сакаат да градат фабрики, а во тек се преговори со компанија од САД и од Швајцарија.
За вкупно 157 милиони евра (9.656.285.000 денари) Владата му го довери стопанисувањето со технолошко индустриската развојна зона Тетово на конзорциумот од две државни и три приватни норвешки компании, Нормак Инвестмент Груп. Според податоците од Бирото за јавни набавки, концесискиот договор меѓу Владата и Нормак Инвестмент Груп е склучен на 05 април годинава.
Слободната економска зона во Тетово е со површина од 94 хектари. Според проекциите, во првата фаза од се планира да се изградат 25 до 30 индустриски објекти и да се вработат околу 7.000 лица.
Денеска и нов погон на Џонсон Мети во Технолошко-индустриската развојна зона Скопје 1 - „Бунарџик“ каде се вложени 60 милиони евра.