Вучиќ направи споредба меѓу Хрватска и нацистичка Германија
Објавено во: Балкан 05 Август, 2018
Пред одбележувањето на 23-годишнината на воено-полициската операција „Олуја“ во Хрватска, српскиот претседател Александар Вучиќ вчера оддавајќи им почит на настраданите Срби во операцијата која ја нарече погром, изјави дека операцијата била мотивирана од омразата кон Србите.
Вучиќ додаде и дека силната Србија никогаш повеќе нема да дозволи вакви настани.
Вели Хитлер сакал свет без Евреи, а Хрватска и нејзината политика сакаа Хрватска без Срби бидејќи, како што беше кажано, „го разурнуваа хрватското национално битие“
Тој на собирот кажа дека „не е случајност тоа што датумите на злосторствата поради различноста на верата и нацијата се исти, бидејќи нацистите на 4 август 1944 провалиле во засолништето на еврејското девојче Ана Франк и ја одвеле во логор да умре“.
„И во двата случаи, единствената вина на Ана Франк и Србите од Краина не било нешто што направиле, туку нечие уверување дека без нив некоја земја, некои луѓе, ќе бидат подобри и поубави. Во двата случаи е барано и применето конечно решение. Во двата случаи, оние кои се поинакви, се обвинети само за своето постоење. И не е случајност тоа што Хитлер во 1919 година ги обвини Евреите за тоа што се „множат“ и што истиот збор го употреби Туѓман во празниот Книн, ослободен од Србите, од сопствените жители“- рече Вучиќ.
Тој порача и дека Србија денес е силна и дека „повеќе никогаш и никаде нема да има никакви „Олуи““, против Србите само затоа што се Срби.