За девет месеци трета усмртена мечка на автопатот Скопје - Тетово
Објавено во: Македонија 15 Јули, 2023
Половина час по полноќ на регионалниот пат Тетово - Јажинце кај Доброште се случила сообраќајна несреќа во која е усмртена мечка, а повредени се две лица. Според информациите на СВР Тетово, по извршениот увид, усмртената мечка е предадена на Јавна установа Национален парк Шар Планина.
- Во СВР Тетово е пријавено дека се случила сообраќајна несреќа во која учествувале две патнички моторни возила, „фолксваген голф“ со скопски регистарски ознаки управуван од Б. Ш(60) од Доброште, „фолксваген туран“ со тетовски регистарски ознаки управуван од Н. Г(39) од Теарце и диво животно мечка. Мечката е усмртена на самото место. Двајцата возачи се здобиле телесни повреди констатирани во Клиничка болница Тетово, информира Марјан Јосифоски, портпарол на СВР Тетово.
Возило управувано од жител на Општина Василево во март удри во мечка која излегла на автопатот Тетово-Скопје кај месноста Карпалак. Од силниот удар, мечката тешка над 100 килограми била усмртена, додека возачот се здобил со потешки повреди.
Кумановец лани во октомври на автопатот Тетово-Скопје, во близина на Карпалак, прегази мечка која потоа почина.