За девет години Романија изградила 52 километри автопат, еден километар чинел 30 милиони евра

Добивај вести на Viber

Романските власти платиле 1,6 милијарди евра за изградба на 52 километри автопат кој се градел девет години, пишува романскиот весник „Гандул“. Весникот денеска објави скандалозен текст со наслов „Фотографија на еден стратегиски грабеж“ во кој се наведува дека за девет години Романците платиле 1,6 милијарди евра за изградба на 52 километри автопат на американската компанија Бехтел, што значи дека еден километар чинел околу 30 милиони евра. Автопатот „Трансилванија“ што треба да ги поврзе градовите Брашов во централниот дел на земјата со градот Борш на границата со Унгарија е амбициозен проект за изградба на 415 километри автопат, потпишан од владата на Социјалдемократската партија предводена од Адријан Настасе во 2003 година, што се претвори во црна дупка од која властите во изминатите две години се мачат да се ослободат, тврди весникот. Од договорот потпишан меѓу Романија и американската компанија Бехтел пред девет години, досега се изградени само 52 километри автопат, што романската држава ја чини околу 1,6 милијарди евра. На овој начин Романија постигна рекорд успевајќи да потроши речиси 30 милиони евра за изградба на еден километар автопат, во услови кога нормалната цена за километар автопат се движи межи 3,8 и 6 милиони евра според теренот, наведува романскиот весник.