За државните 6.000 денари поднесени 70.000 приговори: Парите веќе на сметка, може да се трошат и во кеш

Добивај вести на Viber

Дел од граѓаните кои ги исполнуваат условите и се најдоа на списокот за финасиска помош од 6.000 денари веќе имаат пари на сметка и можат да ги трошат преку картичка но и да ги повлекуваат како готовина. Државата пуштила 24,5 милиони евра вчера кон банките преку кои се доделува помошта. Банките пак од вчера наваму ги обработуваат и постепено ги пуштаат парите на сметка кај граѓаните кои треба да ги трошат. Она што се смени е што сега парите нема да треба да се трошат само со дебитна картичка на македонски производи туку ќе може да се подигнуваат и како готовина и да се трошат по избор на примателот.

Станува збор за околу 283.000 приматели, а по 6.000 денари на сметка добиваат граѓаните со низок доход, пензионери кои имаат до 15.000 пензија, корисници на право на социјална сигурност на стари лица, млади лица од 16 до 29 години, самохрани родители, деца без родители и родителска грижа, уметници и други лица кои вршат дејност во културата, филмски работници и естрадни уметници. 

„Средствата се уплатени на трансакциските сметки на граѓаните во комерцијалните банки, додека за оние граѓани кои немаат отворено трансакциска сметка досега, оваа услуга ќе им биде овозможена од банката во која е распореден соодветниот граѓанин, а за која може да добие информација со внесување на својот ЕМБГ на веб страницата www.kupuvamdomasno.gov.mk.  Информираме дека за многу мал дел од вкупниот број на граѓани, за самохран родител, филмски работници и естрадни уметници, списоците ќе бидат административно-технички потврдени и исплатени до крајот на оваа недела, велат од Владата.

Сепак од викендов наваму од кога беа објавени списоците вистински хаос предизвика оваа мерка која е од четвртиот пакет за поддршка на граѓаните и стопанството. Имено граѓаните тврдеа дека ги нема на списокот и покрај тоа што исполнуваат услови. Системот за праќање приговори не функционираше комплетно, а досега според сознанија на Фактор испратени се околу 70.000 приговори.

„Дополнително, приговорите кои стигнуваа до Генералниот секретаријат на Владата активно се разгледуваат. За граѓаните чии приговори се прифатени, нивните податоците ќе бидат ажурирани и објавени на веб страницата www.kupuvamdomasno.gov.mk. Поддршката насочена кон најранливите групи на граѓани и покрај сите опструкции од опозицијата во Собранието и одолговелкувањето при носење на Законот законот за финансиска поддршка на ранливите групи на граѓани, навреме ќе стигне на сметките на граѓаните, велат од Владата.

. 

А.Т.