За една недела 16.000 граѓани рекоа „не“ за хидроцентралите во Маврово

Добивај вести на Viber

Еколошките организации за една недела успеаја да соберат 16.000 потписи против изградбата на хидроцентралите „Бошков Мост“ и „Луково Поле“ во Националниот парк „Маврово“. Петицијата беше отворена по јавната дебата за контроверзниот проект за изградба на хидроцентралите, која се одржа минатиот четврток во Скопје. На трибината учествуваа стотина граѓани кои за првпат разменија ставови со претставници на Министерството за животна средина и просторно планирање, научници, еколошки организации. Граѓаните и екологистите бараат стопирање на проектот, бидејќи стравуваат дека тој ќе има негативно влијание на животната средина во националниот парк и дека ќе го пренасочи текот на реката Радика. За Владата, двете хидроцентрали се важен енергетски проект, кој може да ја намали зависноста на земјата од увоз на електрична енергија. Сепак, од Владата инсистираат дека проектот нема да се рализира доколку претходните студии покажат дека е штетен за животната средина. На изградбата на хидроцентралата се спротивставува и соседна Албанија, со оглед на тоа што хидроцентралите треба да се градат во близина на заедничката граница. „Луково Поле“, според планот треба да се гради со 62 милиони евра од Светска Банка, а „Бошков Мост“ треба да биде финансиран од Европската банка за обнова и развој.