За Коѕијас НОРМАЛНО е барањето за промена на Уставот, Димитров пак не прифаќа слеано име

Димитров аргументира зошто не е добро името да биде напишано слеано. Тој вели дека би било тешко да му се каже на македонскиот народ дека такво име е прифатливо и оти и во привремената референца – поранешна југословенска Република Македонија, се содржи името на земјата и тоа се преведува на официјалните јазици во ОН.

Според него, со филигранска прецизност се работи на овој процес, за да произлезе нешто добро за двете страни. Димитров рече дека ова е втора вистинска средба за името на која се разговарало за суштинските елементи, а по средбата со Нимиц следната недела, ако има потреба ќе се видат пак.

Двајцата министри се изјаснија дека е потребно решение кое ќе биде достоинствено и чесно за сите и не само што ќе ги решава проблемите од минатото, туку ќе придонесе и за подобра иднина.

Коѕијас вели дека како политичари се должни да ги решаваат проблемите земајќи примери од реалниот живот, а во реалниот живот граѓаните на двете земји имаат добри односи. Тој исто така рече дека крајниот збор ќе го има медијаторот Нимис со кого ќе се сретнат следната недела во Виена.

Во однос на тоа зошто Грција инсистира на промена на Уставот на Македонија, грчкиот министер вели дека на тоа ги натерало искуството од ЕУ, кога се покажало дека одлуките на некои уставни судови биле над европското и меѓународното право.

„И ние во Грција правиме разни уставни промени, тоа не е нешто страшно. Законите, уставите, менталитетот со текот на времето се менуваат. Морална промена е таа што ќе ги задоволни двете страни, не зборувам за екстремистите во двете земји, зборувам за тие што размислуваат за една заедничка иднина. Не бараме едната страна да се уништи, а другата да се радува“, вели Коѕијас.

Коѕијас освен со Димитров, се среќава и со претседателот на Собранието Талат Џафери, со премиерот Зоран Заев, и со лидерите на ДУИ и на ВМРО-ДПМНЕ, Али Ахмети и Христијан Мицкоски.