За справување со миграциите земјите од Западен Балкан добиваат поддршка од МАРРИ
Објавено во: Мои пари 04 Април, 2018
1,1 милион луѓе во 2015 и 2016-та ја поминаа балканската рута а за да се справат со големите миграциски приливи шесте земји од Западен Балкан кои се транзитни до земјите од ЕУ поддршка добија од регионалната иницијатива за миграција, азил и бегалци (МАРРИ).
МАРРИ е единствена регионална иницијатива со основен мандат во мигарцијата и таа има за цел да им даде поддршка на владите на Македонија, Албанија, Косово, Црна Гора, Србија и Бих во усогласување на правната рамка со законодавството на ЕУ, во изградбата на институции и персонал како и во размена на информации.
– МАРРИ во изминатите три години спроведува сеопфатна внатрешна реформа бидејќи се соочуваме со феноменот на огромен прилив бегалци, главно од Блискиот Исток преку западнобалканската рута кон земјите од ЕУ, и сфативме дека овој регионален механизам е корисен и мора да одговори на потребите на шесте влади кои се учесници во механизмот, кажа директорката на МАРРИ Тамара Мугоша.
При големиот бегалски бран во 2015 најмногу погодени биле општините кои немале доволно средства да се справат со бегалците, и во тој контекст ќе се насочат на соработка меѓу централните и локалните власти.
Од МАРРИ не ја исклучуваат можноста од нов бегалски бран, имајќи ја предвид ситуацијата во Сирија и на Блискиот Исток кој традиционално е упориште на меѓународна нестабилност.
– Македонија беше најблискиот и најкусиот пат на мигрантите кон Западна Европа. Сите влади од регионот беа затекнати од огромниот прилив на мигранти и тие реагираа во кризен менаџмент. Но сега имаме доволно простор и доволно дијалог да размислуваме на долг рок како да обезбедиме пред се сигурност на нашите граници, како со заеднички одговор да ги заштитиме човечките права на кои сите сме обврзани, вели Могуша.