ЗА УКИНУВАЊЕ НА АПАНАЖАТА ЛЕВИЦА ЌЕ ПОДНЕСЕ ПРЕДЛОГ ЗАКОН: Поранешни функционери со милионски имоти максимално ги користат привилегиите, вели Апасиев

Добивај вести на Viber

Лидерот на Левица, Димитар Апасиев денеска објави дека пратениците на Левица до Собранието ќе поднесат предлог - Закон за изменување на Законот за плата и други надоместоци на пратениците во Собранието и другите избрани и именувани лица во Републиката - со цел укинување на апанажата.

Апасиев во објавата на Фејсбук наведе дека најголем дел од министрите кои што повеќе не се дел од Владата, максимално користејќи ги сите функционерски привилегии, ќе продолжат да земаат плата од Буџетот на Република Македонија и по престанокот на нивната функција, односно таканаречената апанажа.

-На листата на министри кои што се пријавиле да земаат плата, и покрај тоа што не се на функција, се и Радмила Шеќеринска, Мила Царовска и Никола Димитров, функционери кои по своите анкетни листови располагаат со милионски имот. Наспроти привилегиите кои бесрамно ги користат овие потомци на црвената буржоазија, обичен работник во Република Македонија кој ќе остане без работа, може да зема само 50% од просечната нето - плата која што тој ја земал последната година и тоа под услов, само ако има минимален работен стаж од 9 месеци без прекин или 12 месеци со прекин, пишува Апасиев.