ЗАБРАНА ОД 1 СЕПТЕМВРИ: Граѓаните на САД нема да патуваат во Северна Кореја

Добивај вести на Viber

САД денеска соопшти дека од 1 септември официјално стапува во сила забраната за сите граѓани да патуваат во Северна Кореја. 

Предупредувањето е објавено во државниот регистер, а во него стои дека постои сериозна закана за државјаните на САД, кои патуваат во Северна Кореја.

САД додаваат дека на американските држајани им се закануваат апсења и долготраен притвор. 

„Сите пасоши на САД се прогласени за незаконски за патување во или преку Северна Кореја, освен ако не се специјално овластени за тоа патување“ - пишува во предупредувањето. 

Исклучок претставува одобрен пат во рамки на хуманитарна акција и пат на новинари под одредени околности, додека забраната би требало да остане во сила една година, освен ако претходно не биде повлечена од државниот секретар, Рекс Тилерсон. 

Забраната за патување во Северна Кореја прв пат е воведена минатиот месец, по смртта на американскиот студент Ото Вамбиер, кој падна во кома, откако минал една година во притвор во Пјонгјанг. 

По неговата смрт претседателот на САД,  Доналд Трамп рече дека е решен да ја „спречи таа трагедија во која страдаат невини луѓе во рацете на режимот, кој не го почитува владеењето на правото или основните човекови права“.

САД имаше и критики за ракетната програма на оваа земја.