Загадена е водата во Охридското езеро

Добивај вести на Viber

Фекалии се влеваат во во Охридското Езеро. Најкротично е на северниот дел на езерото, а според податоците на Центарот за јавно здравје од Охрид утврден површинските води кај плажата „Грашница“ во Охрид и кај пумпната станица на Колекторскиот систем за заштита на езерото кај селото Подмоље се сериозно загадени.

И двете мостри за испитување покажале дека водата е од четврта и петта категорија.

„Кај Грашница и Подмоље во земените мостри се пронајдени поголеми количества на амонијак и нитрити. Уште на самиот увид на лице место е констатирано излевање отпадни, фекални води од колекторскиот систем во езерото, и од тие причини ниското ниво на квалитет на водата“, рече Сашо Точков директор на Центарот за јавно здравје од Охрид.

Од Центарот се надеваат дека со стабилизирање на хидролошката ситуација во регионот и со намалувањето на количеството отпадни води ќе се подобри и квалитетот на водата во езерото.

Мострите од источниот дел на крајбрежјето односно кај хотелот „Метропол“ од каде се црпи вода за потребите на Градскиот водовод во Охрид, како и од кај кејот на езерото во самиот град покажале висок квалитет на водата од прва и втора категорија.

Сепак посочуваат од Центарот за јавно здравје изминатите месеци забележана е поголема матност на водата, особено кај селските водоводи.

„Матноста може да последица на зголеменото количество на вода. Сите други индикатори, како микробиолошки така и  хемиски, поакажуваат дека водата е здравствено безбедна и квалитетна за пиење“, појасни Точков.

Во услови на неповолни хидролошки состојби со зголемено ниво на водотоците од сливот, како и на самото ниво на Охридското Езеро, доаѓа до мешање на фекалните односно канализациските со атмосферските води. Истовремено доаѓа до потопување на дел од преливните шахти на цевководите од Колекторот, кој нема капацитет да ја прими сета таа вода, која завршува во Охридското Езеро и го загадува.

И во минатото од „Проаква“ укажуваа на потребата од поголема контрола на нивото на езерото токму од причина да не дојде до потопување на преливните шахти, што доведува до енормно оптоварување на системот и предизвикување дефекти, како и до излевање на фекалната вода во езерото и негово загадување.