ЗАГРИЖУВАЧКИ: Цела бригада џихадисти од поранешна Југославија војува во Ирак и Сирија!

Добивај вести на Viber

Најмалку шест проценти од странските екстремисти кои војуваат во Сирија и Ирак пристигнуваат од балканските земји, проценува Меѓународниот центар за следење на радикализмот (ИЦСР) со седиште во Лондон. Неупадливи, отстапувајќи од класичниот вехабистички изглед, со брада и кратки пантолони, балканските џихадисти се сериозна закана за целиот свет. Во студијата на ЕУ „Салафизам-вехабизам“ експертите истакнуваат дека предворје на џихадот е Босна и Херцеговина, а бојните полиња не се избираат. „Белите ѓаволи“, како што се нарекуваат младите екстремни муслимани од БиХ, војуваат во целиот свет - од Авганистан, преку Чеченија и Турција до Сирија и Ирак, а својот екстремизам го шират и низ целиот балкански регион, но и низ Европа. Тие се инспирирани со вехабизмот и салафизмот, но се трансформирале во нова генерација домашни џихадисти. „Се започна пред 20-тина години, додека во овој регион беснееше војна и кога во БиХ стигнаа околу 3.000 странски исламски доброволци како и големо количество оружје и пари. Така е увезен салафизмот кој денеска се шири низ целиот регион. Вехабистичкото движење собира околу 5.000 од вкупно 1,4 милиони муслимани во БиХ, и тоа најмногу во Сараево“, стои во студијата. Според проценките, во Србија има околу 1.000 следбеници на вехабизмот, додека на Косово околу 2.000. Во Црна Гора се релативно малку, но сосема доволно да предизвикаат сериозни проблеми, особено што ќе бидат дополнително мотивирано кога оваа земја ќе влезе во НАТО. Проценките говорат дека од подрачјето на поранешна Југославија во војните во Ирак и Сирија во моментов се борат повеќе од 1.200 вехабисти, кои дури формираат посебна бригада. Џихадистите од Балканот го освоиле подрачјето околу сириското место Азаз, на пет километри од границата со Турција, регион населен претежно со курдско население. Токму во Азаз тие ги повлекуваат новите регрути од Србија, БиХ, Косово, Македонија и Црна Гора, намамувајќи ги преку социјалните мрежи и во живо, преку своите следбеници. Повеќето новопечени џихадисти немаат никакво борбено искуство, бидејќи според нивната возраст многумина не биле ни родени додека на просторите на поранешна Југославија се воделе војни. Но, затоа повеќето од нив имаат искуство на интернет. Идните џихадисти од Балканот ги собираат, врбуваат и регрутираат преку неколку исламски портали, како што се Патот на верниците и Уммет. Принципот на врбување преку овие портали е добро разработен и речиси секогаш е ист. Приказната започнува со дискусии за исламот, за тоа како е загрозен светот и како треба да се брани. Така агитаторите „фрлаат мамец“ и чекаат посетители на форумите кои ќе се „уловат“ на овие нивни тези. Кога некој ќе „загризе“ и ќе го потврди овој нивен стсв, следи обработување. Исламистите влегуваат во подлабока приказна за исламот со прашања што е подготвен нивниот соговорник да направи за исламот. Кога ќе утврдат дека е подготвен и да загине за религиозна цел, преземаат мерки за тоа лице да се упати во некој од вехабистичките центри во Европа, најчесто во Виена. Од таму преку Турција ги испраќаат во Сирија, појаснува студијата.