Закажано е акционерското собрание: Еве кој ќе го управува кормилото на Македонски Телеком од јули
Објавено во: Економија 28 Мај, 2018
Никола Љушев, поранешниот директор на Вип оператор ќе биде новиот директор на Македонски телеком од јули годинава. Љушев е предложен и треба да биде избран на акционерското собрание на компанијата кое е закажано за 28 јуни. Тој доаѓа на директорската позиција по оставката на досегашниот директор Австриецот Андреас Елснер. Оставка од функцијата во Одборот на директори си поднесе и Павел Хадрболец, а на негово место е предложен Германецот Петер Фаил.
Во предлог одлуката за назаначувањето стои дека Љушев ќе има мандат од четири години. Тој е предложен за неизвршен член на Одборот на директори, но потоа Одборот на директори треба да го избере за извршен член во функција на Главен извршен директор, практично на местото на Елснер. Во прилог на одлуките за акционерското собрание се прикачени и биографите на новопредложените кандидати за директорските позиции.
Друга точка на дневен ред е измена на Статутот на друштвото и определување на нови надоместоци за членовите на Одборот на директори.
Никола Љушев доаѓа во Македонски Телеком од менаџерската позиција во Црногорски телеком каде од 2017 до денес ја извршува функцијата на Главен извршен директор. Претходно беше директор на ВИП. ОНЕ и на Вип оператор.
Кога известија за оставката на Елснер од Макеоднски телеком соопштија дека стратешките проекти, предводени од него ќе овозможат долгорочна одржливост во работењето на компанијата. Како резултат на овие достигнувања, Македонски Телеком ќе може да се справи со идните предизвици, да го предводи патот на дигитализацијата на општеството и да ја задржи позицијата на најдобар оператор на конвергентни услуги.
А.Т.