ЗАКОНОТ: ГРАДОНАЧАЛНИКОТ НА ОПШТИНАТА ВОДИ ЕВИДЕНЦИЈА НА УГОСТИТЕЛИТЕ КОИ ПОЧНУВААТ СО РАБОТА НА НЕГОВОТО ПОДРАЧЈЕ - премиерот: Ние не го штитиме градоначалникот

Добивај вести на Viber

Премиерот Христијан Мицкоски и министерот за внатрешни работи Панче Тошковски во своите вчерашни изјави нагласија дека засега не можат да најдат вина кај, сега екс градоначалникот на општина Кочани, Љупчо Папазов, кој, според нивните искази, немал вина што дискотеката работи нелегално. 

Тој имал надлежност само во делот на легализација на тој објект, и тука немало отстапки во поглед на просторот, па затоа законски требало да го даде одобрението. Вака можат да се парафразира вчерашната изјава на министерот Тошковски.  

Но, јавноста не престанува со реакции, па денеска на увид на властите им го извади членот 8 од Законот за угостителска дејност. Некои од реакциите во јавноста се дека очогледно, како што се пишува, премиерот и министерот, не го прочитале добро законот.

„Согласно член 8 од Законот за угостителска дејност Градоначалникот на општината, а во градот Скопје градоначалникот на општината на подрачјето на град Скопје, води евиденција на угостителите кои почнуваат со работа на нивното подрачје“, стои во законскиот текст.

Согласно член 8 од Законот за угостителска дејност, градоначалникот на Општината, а во Градот Скопје градоначалникот на Општината на подрачјето на Град Скопје, води евиденција на угостителите кои отпочнуваат со работа на нивното подрачје.

Според премиерот, одговорноста на градоначалникот ќе ја утврди Обвинителството.

„Дали и колкава е одговорноста на градоначалникот ќе утврди Обвинителството. Градоначалникот во својата оставка напиша дека стои на располагање за сè, не бега, тука е. Денеска истражните органите ќе влезат и во Општината и ќе ги проверат сите документи. Ако вие пледирате дека тој е ВМРО па ние го штитиме, не, се лажете, никого нема да штитиме. Свети ВМРО да биде и јас да сум, родена сестра, брат да ми е, ќе одговара ако има било каква вина. Одговорност ќе има за сите. Ако е потребна морална одговорност, еве удрете по мене, јас сум тука и ќе се сносам со овој предизвик, но прво ќе ги поразам, како многу пати што сум ги поразил, а потоа на избори граѓаните ќе судат дали и кој треба да сноси одговорност. Свети ВМРО да е, ако направи грешка ќе одговара и тоа сме го покажале досега“, рече Мицкоски.

Од ОЈО информираа дека извршен е распит на градоначалникот, кој дал определени појаснувања и сознанија. Таквиот исказ се споредува со доказниот материјал и надлежностите на општината, по што ќе биде донесена одлука за неговиот натамошен статус во постапката, велат од ОЈО.

„Извршен е распит на градоначалникот кој даде определени појаснувања и сознанија. Таквиот исказ се споредува со доказниот материјал и надлежностите на општината, по што ќе биде донесена одлука за неговиот натамошен статус во постапката“, соопштија од ОЈО.

Фото: ЕПА