Замина Исуф Кадриу, заменик главен одговорен уредник на телевизијата АЛСАТ

Добивај вести на Viber

Колегите од телевизија „Алсат“ споделија тажна вест со јавноста. 

Колегата Исуф Кадриу почина на 52-годишна возраст од срцев удар во туристичкиот град Шенѓин, Албанија, каде бил на одмор со семејството. 

Кадриу е оженет и татко на три деца. Средното образование го завршил во гимназијата во Гњилане, додека новинарство дипломирал на Универзитетот во Тирана. 

Од 2008 година е заменик главен одговорен уредник на телевизијата АЛСАТ, каде што даде извонреден придонес во процесот на организирање и водење на работата во информативната програма на телевизијата, објави телевизиајта.

Во текот на работата се истакнуваше по големата професионална посветеност и колегијалност. Новинарската кариера на Исуф Кадриу започна во 1998 година во телевизијата ЕРА, а од 1999 година во Програмата на албански јазик на Македонската телевизија, каде работеше како уредник на вести до 2008 година, вклучително и чувствителниот период на конфликтот во 2001 година, каде со посветеност, не штедејќи ништо од професионален аспект придонесе за правично и објективно информирање за случувањата на терен, а честопати и самиот беше во улога на воен известувач од фронотот. 

Паралелно со неговите ангажмани во медиумите во земјава, од 2001 година Кадриу е постојан дописник на Радио Слободна Европа од Скопје, од каде известува за политички, економски, културни случувања и настани од Скопје и земјава. 

Колегата Исуф Кадриу ќе остане запаметен како професионалец кој придонесе во динамиката на новинарството, како промотор на објективното следење на настаните и како професионален политички и општествен аналитичар.Сите свои професионални задачи секогаш ги изведуваше почитувајќи го принципот на тимска работа и почитувајќи ги професионалните стандарди и етичките норми.

Вечна му слава! - напишаа во објавата.