Започнува издавањето на гаранции, македонскиот бизнис ќе плаќа скапи царини за извоз ако ги нема

Добивај вести на Viber

На предлог на Министерството за енергетика, рударство и минерални суровини, Владата донесе Уредба со која се отвора патот кон издавање на Гаранции на потекло (Guarantees of origin - GOs).

Гаранциите за македонските производствени компании ќе ги издава националниот оператор на пазарот на електрична енергија – МЕМО, фирма-ќерка на МЕПСО. Овие гаранции ќе значат дека македонските компании добрата што ќе ги пласираат извозно кон ЕУ ги произвеле со струја од обновливи извори на енергија.

Претходно премиерот Христијан Мицкоски рече дека од 01.01.2026 година почнува примена на механизам според кој сите компании кои што извезуваат во рамки на ЕУ мора да покажат дека производите им се произведени со користење на зелена обновлива енергија.

„Гаранција за потекло е електронски документ чија цел е обезбедување на доказ за потрошувачите дека определен удел или количина од енергијата е производена од обновливи извори на енергија. Овие гаранции за потекло се користат во Европска Унија со цел следење и потврдување на потеклото на електричната енергија со што се промовира еколошка одговорно, транспарентност и доверба на потрошувачите на енергетскиот пазар.

Гаранциите за потекло се од огромна важност особено за домашните компании кои извезуваат на европскиот пазар кои ќе можат да докажат дека во оперативниот процес користат чиста енергијата т.е. енергија од обновливи извори, а со тоа го намалуваат јаглеродниот отпечаток“, објави Министерството за енергетика.

МЕМО ќе го воспостави и води регистарот на Гаранции на потекло односно нивно издавање, евидентирање на пренос, признавање, укинување или поништување.