Заседаваше координативното тело – нема опасност од поплави во Македонија!

Добивај вести на Viber

Водостојот во акумулациите и во речните корита низ Македонија е под просекот, а некаде и на двојно пониско ниво. Само во реката Пчиња водостојот е на ниво 1,5 пати повисоко од вообичаеното, вели министерот за транспорт и врски Миле Јанакиески по денешната средба на Координативното тело за превенција на елементарни непогоди. Седницата беше свикана по катастрофалните поплави кои ја зафатија соседна Србија и регионот. На Дирекцијата за заштита и спасување и било наложено во соработка со општините да се преземат превентивни мерки, бидејќи се очекува и наредните денови водите коишто доаѓаат, пред се од Србија, да го зголемат дополнително нивото на реката Пчиња. Општините Куманово, Старо Нагоричане и Петровец треба да ги ангажираат сите свои капацитети, но исто така состојбата будно да ја следат и останатите општини во државава. На седницата е донесен заклучок да не се испуштаат дополнителни води од акумулациите во наредните два дена, бидејќи денеска и утре, согласно информациите од Хидрометеоролошкиот завод, ќе има дождови, но не со голем интензитет, а од недела до крајот на месецот ќе преовладува сончево време со повремени локални врнежи.