Заврши најголемата трансакција на Балканот: Агрокор стана сопственик на Меркатор

Добивај вести на Viber

По завршувањето на јавната понуда за купување на преостанатите акции, хрватски Агрокор од 1 септември официјално стана сопственик на 80,75 проценти од словенечки Меркатор. Со ова е комплетирана најголемата трансакција во регионот. Понудата на Агрокор за купување на преостанатите акции на Меркатор во законскиот рок кој истече на 1 септември, ја прифатиле акционерите-сопственици на 27,63 проценти од акциите, со што Агрокор стигна до удел од 80,75% во Меркатор. Откако го купи мнозинскиот удел од 53,12% во словенечката компанија, Агрокор на 31 јули објави понуда за купување на преостанатите акции. Понудената цена за акција остана иста како при купувањето на првиот мнозински удел, односно изнесува 86 евра. „Со оваа историска трансакција започнуваме да создаваме нова вредност за сите потрошувачи, поголема сигурност за вработените и да иницираме понатамошен развој на економијата во регионот, да го зајакнуваме пазарот за нашите добавувачи, со што конечно ќе ја зголемиме стапката на вработеност. Оваа трансакција е чин на успех, кој ќе доведе до нови вредности“, рече првиот човек на Агрокор Ивица Тодориќ.