Железници Транспорт во 2021 ќе направи загуба од 7,5 милиони евра

Добивај вести на Viber

Железници Транспорт и во 2021 ќе направи голема загуба, а според бизнис-планот на ова акционерско друштво во државна сопственост, таа ќе изнесува 469.582.000 денари. Претпријатието за железнички транспорт на стока и патници веќе е најголем должник и минатата година ја заврши со долг од 58,4 милиони евра.

„Со набавката на четирите локомотиви кои се во сообраќај состојбата на техничко-технолошка експлоатациона моќност на ЖРСМ Транспорт АДСкопје се зголеми, трошоците на експлоатација се намалени, а со самото тоа финанасиските резултати се подобруваат“, сметаат од таму, но ситуацијата во реалноста е поинаква.

Планираните вкупни трошоци се 1.736.227,00 илјади денари, додека планираните вкупни приходи изнесуваат 1.266.645,00 илјади денари. Транспортните приходи се планира да изнесуваат 861.400,00 илјади денари.

Државата стандардно од сопствениот буџет преку Министерството за транспорт и врски ќе даде 400 милиони денари за субвенионирање на патничкиот сообраќај, за кој пак се потребни  817 милиони, поради што се очекува загуба од 378 милиони во овој сектор, имајќи предвид дека самите патници за билети ќе платат само 35,8 милиони. И кај товарниот сообраќај е планирана загуба од 91,2 милиони.

Вицепремиерот за економски прашања Фатмир Битиќи најави Физбилити студија, меѓуостанатите, и за ЖРСМ Транспорт која ќе покаже дали ќе има потреба и можност за негово управување преку јавно-приватно партнерство, или пак ќе треба да се реорганизира.

„Нашите анализи покажаа дека преструктуирањето на некои од претпријатијата е неминовен процес кој што ќе се одвива во наредниот период, впрочем истите се во корелација со податоците од оваа анализа. Веќе знаете дека Владата има започнато процес на избор на компании за физибилити  студија за Македонски пошти и ТЕЦ Неготино и истиот процес ќе следи и за Железници на Северна Македонија Транспорт, ТЕЦ Осломеј или дел од енергетските капацитети кои функционираат во рамките на АД Електрани на Северна Македонија. 

Според податоците од физибилити студијата ќе се утврди моделот кој е најсоодветен за преструктуирање на овие претпријатија, дали тоа ќе биде јавно приватно партнерство или пак можеби приватизација на истите“, рече Битиќи.

А.К.