Живојно лежи на 100 милиони тони јаглен – отворање рудник дури за 2 години?!

Добивај вести на Viber

ЕЛЕМ се уште нема прецизни информации дали потенцијалната термоелектрана би се градела во Живојно или во Мариово, каде што исто така, се предвидува отворање на рудник за јаглен со подземна експлоатација   По едногодишно истражување ЕЛЕМ конечно ги искристализира рудните потенцијали на дел од Пелагонискиот басен-локалитетот Живојно располага со геолошки резерви од 101,6 милиони тони јаглен. Ова го покажуваат последните, ревидирани елаборати од деталните геолошки истражувања на Живојно, кои за 3,5 милиони евра ги правеше Градежниот Институт Македонија (ГИМ). И покрај оптимистичките најави за можното ископување на лигнит, со што ќе се продолжи животниот век на термоелектраната во Битола, во Државните Електрани допрва ќе одлучуваат дали и кога би се отворал рудник кај Живојно. „Истражувањата се завршени во март 2013 година, а со изработката на  Елаборати за рудните резерви и нивната ревизија се заокружи процесот на доистражување во Живојно како локација за нов рудник за јаглен, кој е неопходен за продолжување на животниот век на РЕК Битола. Ова наоѓалиште ќе биде уште еден можен рудник во Македонија каде јагленот ќе се вади со примена на подземна технологија за експлоатација. Со изработката на Главниот Рударски проект за отворање и експлоатација на јагленот од наоѓалиштето Живојно ќе се започне по завршувањето на тендерската процедура за избирање на проектантска куќа, односно во втората половина на 2013 година. Сегашните проценки се дека во овој рудник, АД ЕЛЕМ ќе инвестира околу 100 милиони евра, а реализацијата би започнала после изработката на  Главниот  Рударски проект, чија изработка би траела околу 2 години“, објаснуваат од ЕЛЕМ за Фактор. Ќе добие ли Пелагонија нова, 300 мегаватна термоелектрана?! Според досегашните анализи, од Живојно може да се ископува лигнит, чијашто калорична вредност од околу 8.000 килоџули за килограм економски е оправдана за во следните две години ЕЛЕМ да почне со јамска експлоатација на јагленот. „Најверојатно од Живојно, ќе можеме да вадиме помеѓу 2,5 милиони и 3 милиони тони јаглен годишно, што е доволно за да се отвори една нова термоелектрана со капацитет од 200 до 300 мегавати. Квалитетот на јагленот кој досега е изваден има калорична вредност поголема од јагленот што се вади од рудникот Суводол, а потоа од него се произведува струја во РЕК Битола“, изјави поранешниот директор на ЕЛЕМ, Влатко Чингоски пред една година, кога ЕЛЕМ почна да ги доистражува рудните потенцијали на локалитетот Живојно. Се уште нема прецизни информации дали потенцијалната електрана би се градела во Живојно или можеби во Мариово, каде што исто така, се предвидува отворање на рудник за јаглен со подземна експлоатација. Се проценува дека со јамската експлоатација на лигнитот Живојно ќе егзистира најмалку 20 години. Со очекуваниот ископ од околу три милиони тони јаглен најверојатно би се произвеле 2.000 гигавати струја годишно. Живојно се наоѓа на околу 30 километри од грчката граница.  Рудни резерви има-инвеститори нема! Слаб е интересот за македонските рудници. Низа пропаднати тендери и инвестиции во најава покажуваат дека рудните потенцијали на Македонија се уште се недоволно искористени. Иако Владата очекува рударството и понатаму да биде една од клучните гранки за економијата, познавачите сугерираат дека се неопходни нови, поголеми инвестиции во овој сектор. Инвеститори од Оман неколку пати до сега меркаа рудници во Прилеп и Осогово. Владата никако да најде инвеститор и за рестартирање на рудникот Тајмиште, богат со железна руда. Ако државната ЕЛЕМ се изземе од активностите во секторот рударство, за сега, локалалитетите Кадиица, Боров дол и Иловица, богати со бакарна руда, остануваат како најатрактивни за инвеститорите. К.П