ЗНМ и ССНМ со поддршка за „Утрински“ - Да се спречи притисокот врз новинарите

Добивај вести на Viber

Новинарските организации ЗНАМ и ССНМ побараа да се спречат притисоците врз новинарите на „Утрински“, да се почитуваат работничките права и да се задржат сите новинари на работните места. 

„Ние сме цврсто уверени и истакнуваме дека актуелната лоша економска состојба во компанијата и намалените тиражи на весниците најмногу се последица на слугинскиот однос на сопствениците на медиумите кон власта. Таквиот однос продуцира лоши деловни одлуки, меѓу другото и поставување „пожелни“ главни уредници, мешање во уредувачката политика и, на крај, производ – весник кој не е интересен за публиката. Затоа паѓаат тиражите. Затоа што сопствениците, за да бидат ценети кај властите, се дрзнуваат да запираат затворен весник во печатница и да менуваат насловни страници или, пак, да менуваат цели уредувачки тимови во тиражно успешни весници и за шест месеци да ги сведат тие весници на безвреден и неинтересен медиумски производ“, истакна Тамара Чаусидис претседателката на Самостојниот синдикат на новинарите и медиумските работници.

Заложба за „Утрински весник“ пристигна и од Здружението на новинари.

„Упадот на институциите во медиумите треба да се спречи. Тоа е единствениот начин за да се развие медиумскиот пазар, кој иако мислиме дека го имаме, допрва треба да се развива“ изјави Насер Селмани претседателот на Здружението на новинари на Македонија.

Пораки за поддршка и критики кон раководството на МПМ пристигнуваат и од граѓанските невладини организации кои се залагаат за поголема медиумска слобода во Македонија.