„Алкалоид“, очекувано прв, потврди дека ќе подели дивидедна! Колкава ќе биде?

Добивај вести на Viber

Речиси две децении „Алкалоид“ континуирано дели дивиденда на своите акционери. И годинава продолжува оваа добра корпоративна практика по која е препознатлива нашата најголема фармацевтска индустрија. Во финансискиот план за 2025 година „Алкалоид“ објави дека предлог – одлуката за поделба на дивиденда ќе биде пред акционерите во првата седмица на април. Фармацевтскиот гигант, веројатно во мај, со дивиденда ќе израдува над 5.000 акционери – домашни физички лица. Дури 97% од целатат дивиденда што ќе ја подели „Алкалоид“ останува во Македонија

Македонскиот фармацевтски гигант ги израдува своите акционери и потврди дека во првата седмица на април ќе одржи акционерско собрание на кое ќе се потврди одлука за исплата на дивиденда.

Ова е очекувана вест затоа што „Алкалоид“ е компанија со беспрекорна дивидендна историја која има континуитет од две децении.

Износот на дивиденда ќе биде објавен најдоцна во првата седмица на март годинава во предлог одлуката која Собранието на акционери ќе ја гласа во првата седмица на април годинава.

Вообичаено, од досегашното искуство со таа акција, износот на дивиденда, во бруто износ, од добивката за 2024 година може да биде повисок до 10 отсто од износот што беше поделен за успешното работење во 2023 година.

За потсетување, кон средината на мај 2024 година, „Алкалоид“ на своите акционери исплати дивиденда во бруто износ од 540 денари по акција. Односно по одбитокот на данок на заддршка кај правни лица и персоналец кај домашни физички лица дивидендата беше 486 денари за акција.

„Алкалоид“ лани во мај исплати бруто дивиденда во вкупен износ од 12,57 милиони евра на своите над 5.000 акционери домашни физички лица. Поголем износ на дивиденда на овие акционери ќе биде исплатен годинава за добивката на компанијата во 2024 година.

Кон крајот на овој или на почетокот на идниот месец „Алкалоид“ ќе го објави и извештајот за финансиското работење за цела 2024 година, по што ќе се знае и добивката за минатата година.

Акцијата на „Алкалоид“ е една од двете најликвидни и најценети акции на нашата берза. Тоа го потврдува и аргументира фактот што акцијата на „Алкалоид“ учествува со 20 отсто во структурата на целиот берзански индекс МБИ-10. Исто учество како што има „Алкалоид“ во МБИ-10 има само уште и акцијата на „Комерцијална банка“.

Повеќе детали за Финансискиот план на „Алкалоид“ за 2025 година може да прочитате на следниот линк https://seinet.com.mk/document/67246

Н.С.