СОМНЕЖИТЕ НЕ ЈА ПОКОЛЕБАА ВЛАДАТА! Денеска се потпишува договорот со „Бехтел и Енка“
Објавено во: Економија 08 Март, 2023
Наспроти сите контроверзии и сомнежи поврзани со компанијата и изградбата на автопатите по коридорите 8 и 10д, денеска во Владата е закажано потпишувањето на договорот со „Бехтел и Енка“.
Изминатиов период во медиумите беа изнесени бројни сомнежи поврзани со дел од компаниите избрани да бидат надзор на изградбата на автопатите од коридорите 8 и 10-д, но тие не беа причина Владата да се предомисли.
Во соопштението испратено од владината прес-служба се наведува дека среда во Свечената сала на Владата ќе се одржи настан по повод потпишување на договор за Коридор 8 и 10-д помеѓу Министерството за транспорт и врски, Јавното претпријатие за државни патишта и конзорциумот „Бехтел и Енка“. На потпишувањето на договорот ќе бидат премиерот Димитар Ковачевски, првиот вицепремиер Артан Груби, министерот за транспорт и врски Благој Бочварски, директорот на Јавното претпријатие за државни патишта, Ејуп Рустеми, како и генералниот директор за нискоградба „Бехтел“, Марк Алисон.
Претходно на владина седница, на предлог на Комитетот за преговори за склучување на Договорот за градење на коридорите 8 и 10-д, беше одобрено склучувањето на договорот со избраниот стратешки партнер, конзорциумот „Бехтел и Енка“.
- Со тоа, ќе се овозможи почеток на изградбата на овие важни проекти и реализација на оваа многугодишна стратешка определба за инфраструктурно поврзување на Република Македонија со регионот, што ќе придонесе и во економскиот развој на државата - информираа од владината прес-служба.
Вицепремиерот Артан Груби синоќа во телевизиско гостување посочи дека конечно е усовен Договорот за Коридорите
- Денеска имаше широка елаборација во однос на нивниот завршен извештај за нивните елаборати и утре е потпишување на договорите. Би замолил новинарите да ги повикаат консултантите да го претстават проектот, а не тоа да го прават политичарите, туку експерти. Се работи за изградба на автопатишта од 110 километри. Ова ќе не чини, 1,3 милијарди евра или 2 милиони евра по километар што е во рамките на просекот на градба на автопатиштата - рече Груби.
Коридорот 8 е долг 68 километри и станува збор за автопатот од Тетово до Гостивар, потоа кон Кичево, преку Струга до Ќафасан, додека Коридорот 10-д е на делницата од Прилеп до Битола со должина од 40 километри и има шест ленти, а периодот на изградба е три години од почетокот на работите.
Изминатиов период имаше бројни показатели дека договорот ќе биде потпишан со „Банхтел и Енка“. Фактор објави дека компанијата ќе треба да им купи најмалку 40 нови автомобили на надзорниците на консултантот ИРД.
Деновиве на прес-конференцијата на опозициската ВМРО-ДПМНЕ, што ја одржа пратеникот Бојан Стојаноски, беше истакнато дека Владата на Ковачевски влегува во сомнителни бизнис шеми во постапката за изградба на автопати во Македонија, и потенцираше дека бизниси од 22 милиони евра добиваат фирми кои претходно имале забрана заради неетичко и незаконско постапување.