55 проценти од родителите не ги однеле своите деца на ортопедски преглед?!

Добивај вести на Viber

„Постои мала информираност за сколиозата, како настанува, како да се спречи, кои се последиците, станува збор за сериозно заболување кое се појавува потајно. Многу често децата и покрај започнатиот процес на искривување на ‘рбетниот столб сепак имаат исправен став, а другите симптоми сè уште не се забележливи до тој степен. Затоа најмногу загрижува бројката од 55% кои не го однеле своето дете на ортопедски преглед“, изјави д-р Иванка Стефановска, шеф на одделението за ортопедија во Ремедика.

Сколиозата кај децата е чест здравствен проблем во секоја општина, покажуваат резултатите од спроведеното истражување, во општина Аеродром.

Истражувањето спроведено во оваа општина ги потврди заклуцоците и стравувањата од претходно објавените резултати од општина Центар.

„Продолжуваме со истражувањето иако резултатите од општина Аеродром ја потврдија нашата решеност да спроведеме кампања за зголемување на свесноста од сколиозата. Нашите првични сомневања се потврдија и овој пат дека потребата од таква кампања е огромна.“, изјави д-р Иванка Стефановска, шеф на одделението за ортопедија во Ремедика.

Истражувањето беше спроведено со анкетни прашалници во сите седум основни училишта во општина Аеродром на 2250 испитаници. На прашалниците одговараа родителите на децата од прво до осмо одделение.

“Иницијативата од Ремедика за спроведување на оваа анкета ја прифативме со задоволство затоа што и кај нас постојат некои индикации дека модерните времиња и начинот на живот се причина за појава на вакви искривувања кај најмладите. Резултатите и бројките од ова истражување нѐ уверија во тоа и затоа се надеваме на една заедничка акција и реагирање, родителите, здравствените и образовните институции, а секако и општината. “, изјави Ивица Коневски, градоначалник на Општина Аеродром.

Коневски кажа дека една од примарните цели е вложување во спортот и дека во иднина планираат реализирање на голем број спортски активности кои дефинитивно ќе придонесат за подобрување на здравјето кај децата и превенција од секаков тип на заболувања.

Ремедика врз основа на резултатите од анкетата заедно со заклучоците од секојдневна пракса започна со кампања за подигнување на свесноста кај родителите за сколиозата, а со тоа ќе придонесе кон стопирање на понатамошно искривување на ‘рбетниот столб кај младата популација.

Кампањата ќе вклучува едукација на децата, родителите и воопшто зголемување на свеста за причините, последиците, симптомите и начините за спречување на сколиозата.

.